Regjeringa foreslår å auke kvoten for søkjarar med førstegongsvitnemål.

Frå 14 til 4 tilleggspoeng

Matematikk og militæret skal fortsatt gi tilleggspoeng, men ikkje alder, framandspråk og folkehøgskule.

Inger Johanne Rein
redaktør i Lektorbladet
Publisert

I dag kan søkjarar få opptil 14 tilleggspoeng til saman, i tillegg til kjønnspoeng. Dette har gitt kunstig høge poenggrenser for å komme inn på fleire populære studium. Enkelte stader ligg poenggrensene opp mot 70 poeng i den ordinære kvoten. Regjeringa foreslår maksimalt 4 tilleggspoeng, mellom anna for realfag og avtent verneplikt.

Større førstegongskvote

For å dempe karakterpresset og sørge for at unge kjem raskare i gang med studium, foreslår regjeringa å auke kvoten for søkjarar med førstegongsvitnemål. Denne endringa ønsker dei allereie frå opptaket til studieåret 2026/2027.

Ny omrekning for IB

Elevane med IB har ein annan karakterskala enn elevar fra norsk vidaregåande opplæring. No vert det sendt ut på høyring forslag om ny tabell for omrekning av karakterar fra IB-diplom.

Frist 18. juni

Forslaget om nye opptaksreglar til høgare utdanning er no sendt på høyring med frist 18. juni 2025.

 

Innføring over fire år

Opptak i 2026/2027:

  • Kvoten for førstegongsvitnemål aukar frå 50 til 70 prosent, og aldersgrensa for å kunne konkurrere i førstegongsvitnemålskvoten blir 23 år, ikkje 21 år.
  • Det vert opna for kjønnsnøytrale kvotar, og ordninga med kjønnspoeng vert avvikla.
  • Det vert opna for bruk av lokale opptaksprøver.
  • Det skal ikkje lenger vere krav om arbeidserfaring ved opptak på grunnlag av dei seks fellesfaga i vidaregåande opplæring (dagens 23/5-ordning).
  • Ny tabell for utrekning av karakterar frå IB-diplom til norske karakterar.

Opptak i 2027/2028:

  • Tilleggspoeng for alder, høgare utdanning, fagskule og folkehøgskule vert avvikla.
  • Tilleggspoeng for militær førstegongsteneste og sivilteneste vert halvert frå to til eitt.

Opptak i 2028/2029:

  • Tilleggspoeng i framandspråk og naturbruk vert avvikla.
  • Tilleggspoeng for realfag vert vidareført, men blir halvert.
  • Tilleggspoeng for søkjarar som har samisk som førstespråk i vidaregåande opplæring, vert innført.

Opptak i 2029/2030:

Endring i kven som kan konkurrere i kvote for søkjarar med samisk språkkompetanse, slik at det berre er søkjarar med samisk som førstespråk eller andrespråk nivå 2 frå grunnskule og vidaregåande opplæring som kan konkurrere i kvoten.

artikler
Powered by Labrador CMS